loftið okkar

Í eyjum

// July 3rd, 2009 // enginn skilaboð » // Fréttir

Það er nú soldið langt síðan ég setti eitthvað hérna inn og ýmislegt líklega búið að gerast síðan. Það svona helsta er væntanlega það að Gísli er búin að vera á flakkinu. Fór til Luxemborgar að vinna og er núna í Möltu að vinna. Við mæðgur ákváðum því að skreppa til eyja. Það var reyndar aðeins tvísýnt með hvort við gætum farið til eyja. Andrea veiktist nefnilega, hún fékk slæma magapest. Ég hef bara aldrei séð hana áður með svona mikla verki. Hún stóð sig eins og hetja þegar læknirinn sendi hana í blóðprufu. Þetta var í annað sinn sem hún fer í þannig og þegar hún fór fyrst þá var hún svo lítil að hún man ekkert eftir því. Hún hreyfði sig ekki neitt og kveinkaði sér ekkert. Sagði mér reyndar svo þegar við vorum komnar fram að henni hefði þótt þetta vont og fékk tár í augun við upprifjunina. Það kom allt fínt út úr blóðprufunni, það var verið að ganga úr skuggum um að þetta væri ekki botnlanginn. Á þriðjudagskvöldinu var skvísan nokkuð hress þannig við ákváðum að halda planinu og fórum til eyja daginn eftir.

Það er bara búið að vera mjög fínt hérna, gott veður og heitt þrátt fyrir að það sé  þoka. Það er goslokahátíð núna um helgina, þannig það er ýmislegt um að vera. Í dag var verið að heilsteikja naut og ýmsir eyjamenn með sýningar á handverkum sínum. Voða gaman. Á morgun verður síðan eitthvað um að vera fyrir börnin í bænum og síðan um kvöldið  verður víst hörku djamm í Skvísusundi.  En Andrea er búin að vera þvílíkt ánægð með lífið í eyjum, fór í dag í fjöruna með afa sínum, er búin að nota systkinapallinn, sem við fengum lánaðann á vagninn, mjög mikið. Alveg ólm í göngutúr en vill svo ekkert ganga, bara standa á pallinum… lúxus líf hjá henni og góð æfing fyrir mömmuna

Hvítasunnuhelgin

// June 6th, 2009 // enginn skilaboð » // Fréttir

Við fórum til eyja yfir hvítasunnuna, því amma átti afmæli á hvítasunnudag, hún varð 88 ára en ekki 89 ára. Smá mistök í talningunni hjá mér.  Við fengum óvæntan gest með okkur til eyja, nefnilega hana Rósu. En Rósa er gíraffi sem á heima á leikskóladeildinni hennar Andreu og er hún að kenna krökkunum á deildinni að bera ábyrgð. Síðan fær hún að fara í helgarheimsóknir með krökkunum og þessa helgi átti hún að fara heim með Andreu. Gefjun kom einnig með okkur til eyja og gekk það bara ljómandi vel, hún ældi ekkert í herjólfi á leiðinni til eyja en það voru nokkrar áhyggjur um það, þar sem veltingur var frekar mikill og við náðum ekki á dýraspítalann í tæka tið til að ná í sjóveikislyf handa henni.

Það var bara ljómandi fínt í eyjum, fengum æðislegt veður fyrir utan smá rigningarskúr á laugardeginum. En þá vorum við niðrí fjöru þegar byrjaði að rigna og urðum að hlaupa inn í bíl til að verða ekki gegndrepa. Það var fjölskylduhelgi í eyjum þessa helgi og voru einhverjar uppákomur, við reyndar nýttum okkur  bara það að það var frítt á náttúrugripasafnið og í sund. María Þrá skemmti sér vel í sundinu, enda finnst henni voða gaman í baði… soldið lík mömmu sinni Hún er frekar fyndin með sundhettuna sína. Við ætlum að ná mynd af henni með hettuna því það er ansi erfitt að lýsa því hvernig hún er með hettuna, nema að hún verður enn meira lík henni Öddu ömmu sinni þegar hún er með hana.

Á sunnudeginum var afmælisveislan, það var mjög gaman að hitta alla og gömlu konuna. Hún var nú ansi hress þó hún vissi ekki alveg hver ætti hvaða börn eða hvað börnin hétu, hvort sem það voru barnabörnin eða langömmubörnin. Hún var heldur ekki alveg viss hvort hún ætti heima á elliheimilinu og hvort hún myndi rata á herbergið sitt og þannig fram eftir götum. En þetta var mjög skemmtilegt. Andrea spurði reyndar afhverju við stoppuðum alltaf bara 2 daga í eyjum. ehemm… en jæja við mæðgur munum stoppa lengur í sumar þegar Gísli fer til Möltu að vinna.

Við fórum síðan heim á mánudeginum og eftir að hafa gengið lauslega frá öllu þá var komið að næstu afmælisveislu, en hún Svandís var að halda upp á 2ja ára afmælið sitt.

Bjartir dagar og nöfn

// May 27th, 2009 // enginn skilaboð » // Fréttir

Bjartir dagar hefjast á morgun hérna  í firðinum og hafa leikskólabörn verið að vinna listaverk sem verða til sýnis yfir dagana. Leikskólinn hennar Andreu sýnir sín verk á Bæjarskrifstofunum. Ég hvet alla til að fara og kíkja á listaverkin, Andrea var að vinna í þessu verkefni. Þemað var höfnin, þar sem Hafnarfjarðarhöfn er 100 ára. Þau fóru einmitt í dag að hengja upp listaverkin sín. Andrea sagði að þetta hefði verið skemmtilegasti dagurinn, hjólaði í leikskólann, fór í strætó og hengdi upp listaverkin, setti niður kartöflur og fræ til að rækta gulrætur og fleira.

Ég fór á bókasafnið og náði í bókina hennar Guðrúnar Kvaran um nöfn íslendinga.

Guðrún: Nafnið mjög algengt, líklega eins og flestir vita. Nafnið er þekkt á öllum norðurlöndunum og Þýskalandi. Það barst til Bretlands frá Þýskalandi.  Nafnið merkir: guðlegur leyndardómur.

Gísli:  Nafnið kemur fyrir í Landnámu og fornsögum. Þekktasti einstaklingurinn er væntanlega Gísli Súrsson. Nafnið merkir: herfangi.

Haukur:  Nafnið kemur einnig fyrir í Landnámu og víða í Íslendingasögunum.

Andrea:  Nafnið var fyrst notað hérna í lok 17. aldar og var fyrst borið af konum af erlendum ættum. Andrea er kvenkynsmynd af nafninu Andreas. En Andreas er norræn mynd af gríska nafninu Andréas  eða Andrés. Nafnið er sótt í biblíuna og merkir: hugrakkur.

Ruth: Nafnið er ritmynd af Rut og var fyrst notað hér á síðari hluta 18. aldar. Rut er biblíunafn og var Rut móabítísk kona sem fylgdi Naomi tengdamóður sinni til Betlehem. Hún gekk síðar að eiga Bóas og varð ættmóðir Davíðs. Samkvæmt bókinni er merking nafnsins óviss, en ef maður googlar, þá kemur fram að nafnið merkir ,,Beloved”.

María: Var ekki notað í þessari ritmynd fyrr en líða tók á 18. öld. Nafnið varð fljótt vinsælt og algengt.  Það er biblíunafn þar sem það tengist auðvitað Maríu mey. En María varð til fyrir misskilning úr eldri gerð Mariam. Mariam er arameisk hliðarmynd af hebreska nafninu Miriam. Samkvæmt bókinni er merking nafnsins óviss. En Miriam merkir hin fagra. Ef maður googlar nafnið þá kemur fram að þýðir ,,star of the sea”.

Þrá: Einni stúlku var gefið þetta nafn á áratugnum 1931-1940 og tvær konur voru skráðar í þjóðskrá 1989. Nafnið merki: löngun, eftirvænting.

Sumarið virðist vera komið

// May 26th, 2009 // eitt skilaboð » // Fréttir

Hérna í Þrastarásnum er allt gott að frétta, lífið gengur sinn vanagang. Andrea Ruth er mikið að pæla í öllum hlutum og er farin að minna einna helst á rassálfana í Ronju Ræningjadóttur. Algengasta orðið út úr hennar munni undanfarna daga og vikur er ,,Afhverju?” Afhverju er viðkvæðið við öllu sem maður biður hana um að gera.  Hún er ofboðslega dugleg að leika við Maríu Þrá og finnst þeirri stuttu það ótrúlega gaman. Hún er svo hrifin af stóru systur sinni, Andrea þarf bara að birtast og segja hæ við hana þá fer María að brosa og hjala.

Við vorum að koma úr foreldraviðtali á leikskólanum og við eigum greinilega bara alveg frábæra stelpu. Það gengur rosalega vel á leikskólanum og það var allt mjög svo jákvætt sem við fengum að heyra, ekki neitt neikvætt. Hún er dugleg, með góða einbeitingu, nákvæm, þolinmóð (það þekkist reyndar ekki hérna heima) og margt fleira jákvætt. Ekkert smá gaman að fá svona fréttir af henni. Hún stendur sig greinilega mjög vel í leikskólanum.

Við erum að fara til eyja um hvítasunnuna. Amma gamla verður 89 ára og á að halda upp á afmælið með stæl Það verður vonandi gott veður svo hægt sé að gera eitthvað skemmtilegt með Andreu. Lofaði henni síðast að næst þegar við færum til eyja þá yrði farið í fjöruferð… vonandi verður hægt að standa við það.

frægð og frami

// May 19th, 2009 // enginn skilaboð » // Fréttir

Það er  búið að vera alveg yndislegt síðustu daga, veðrið er bara æði. Við erum eiginlega bara búnar að vera út í göngutúrum og njóta veðurblíðunnar.

Á sunnudaginn þá fórum við mæðgur í göngutúr með Gefjunni. Kötturinn er þvílíkt hugaður og ætlaði að ráðast á labradorhund sem við mættum, en ég náði að taka hana upp áður en hún réðst á trýnið hundinum. Göngutúrinn endaði í efstuhlíðinni en Gísli var þar að myndast við að bóna bílinn, bíllinn orðinn glæsilegur. Gefjunni fannst þvílíkt gaman að elta hunangsflugurnar, soldið erfitt samt í ól. Anna amma og Valdi afi vorkenndu henni að vera í svona stuttri ól þannig að snúrubandið var tekið niður og lengd í ólinni hjá kisu. Kisa ánægð með það en tókst að flækja sig nokkrum sinnum. Þegar við komum heim þá var Gefjun svo þreytt eftir heilan dag í útiveru að hún svaf til miðnættis.. haggaðist ekki.

Auðvitað verður að segja frá júrókvöldinu. Allir ánægðir með árangurinn hjá Jóhönnu Guðrúnu. Andrea hélt með tyrkjum og finnum en var rosa ánægð með framlag Íslands. Hún söng með hástöfum og skemmti okkur öllum.  María vildi auðvitað vera með í teitinu og tók bara nokkra orkublunda yfir kvöldið svo hún gæti nú fylgst með.

Í gær fórum við María í heimsókn í hlíðarnar til þeirra Aisté og Amelíu. Skelltum okkur svo í göngutúr niðrí miðbæ og það var bara æðislega gaman.  María svaf allan tíman en Amelía vildi fylgjast með og vakti svo til allan tíman.  Þegar Andrea var búin á leikskólanum þá fórum við mæðgur og hittum E-bet inn í Kópavogi og tókum annan göngutúr. Andrea týndi fullt fullt af fíflum og þegar hún þefaði af þeim þá skellti hún nefinu alveg ofan í þá. Þannig hún varð ansi gul á nebbanum. Þegar við komum heim þá sagði ég henni að hún væri nú bara eins og sólin. Henni fannst það voða fyndið.  Yfir kvöldmatnum snerist umræðan um frægð og frama. En Andrea tilkynnti það að hún vill verða fræg, að allir eigi að þekkja hana. Ég spurði hana hvernig fræg hún vildi verða. Færgur læknir, frægur dansari, frægur söngvari, frægur lögfræðingur eða hvað? hún var fljót að svara því. Færg eins og Páll Óskar og Jóhanna Guðrún. Þá kom spurningin, “hvernig verður maður frægur’” Það verður að segjast að það er ljómandi góð spurning. Sögðum henni að hún yrði bara að leggja hart að sér, vera dugleg og ekki gefast upp.

jæja best að koma sér að  verki svo hægt sé að fara út í sólina.