loftid.net

Vikan sem er að líða er búin að vera ansi viðburðarrík hjá okkur. Andrea var öll að hressast um helgina og ætluðum við að taka ákvörðun um það á mánudagsmorgninum hvort hún færi á leikskólann eða yrði hjá Önnu ömmu. Hún hóstaði soldið um nóttina þannig það var ákveðið að hún færi til ömmu. Hún var voðalega ánægð með það. En áður en hún komst þangað þá lendum við í smá vandræðum.
Ég vaknaði um nóttina við eitthvað píp, heyrði 2 píp.. vissi ekki hvað þetta var og var að hugsa um að vekja Gísla og láta hann athuga þetta.. en þar sem ég heyrði það ekki aftur, þá ákvað ég að þetta væri bara talvan inn í þvottarhúsi og að hún væri nú búin að slökkva á sér og fór aftur að sofa. Þegar Gísli fer svo fram úr um morguninn þá gengur hann á vegg… gasvegg!! Hann flýtir sér að opna útidyrahurðina, svalahurðina, stofugluggann og eldhúsgluggann (en það var pínu rifa á eldhúsglugganum). Þegar hann er inn í eldhúsi þar sem við geymum gaskútinn.. heyrir hann bara “hviss” hljóð. Hann kom svo inn í herbergi og lét mig vita hvað var að ske. Við létum Andreu vera inn í svefnherbergi og ég fór að velta fyrir mér hvort pípið sem ég hafði heyrt hefði verið í gasskynjaranum, við töldum það samt ólíklegt því hann hefði ekki átt að hætta að pípa.. nema hann hefði orðið batteríslaus eftir að hafa pípt tvisvar… jæja, ekki fundum við gasskynjarann.. hann var ekki á veggnum þar sem hann var upphaflega settur og ekki inn í skáp hjá kútnum.

Continue reading →

Fór með Andreu til læknis. Hún er alveg hræðilega hás greyið og hálf raddlaus. Hún er enn með hita, en hann er búinn að lækka aðeins. Hún er ekki með streptakokka og ekkert ofan í lungunum. Þetta er veira sem er í hálsinum og í raddböndunum. Hún andar svona furðulega, bæði af því að hún er stífluð í nefinu og vegna þrengsla í hálsinum. Ekkert hægt að gera nema slappa af og láta sér batna, fá saltvatnsdropa í nefið og svona. Hún verður örugglega orðin góð á mánudaginn.

Brandari dagsins hjá Andreu er þessi:
Einu sinni var kartafla sem fór til læknis.
Hvað var að henni?
Hún var með hósta.

Svo hló hún alveg innilega að þessu. Adda amma kom svo færandi hendi eftir að hafa keyrt okkur til læknisins.. hún kom með karamellusnúð og kókómjólk handa skvísunni. Andrea alveg í skýjunum núna að gæða sér á honum og horfa á Mamma Mia… í þriðja sinn á þrem dögum… maður er orðinn alveg Abba sýrður út í gegn.

Andrea er búin að vera veik núna í tvö daga, við mæðgur höfum því verið heima. Hún er alveg þvílíkt kvefuð og með hita. Samt alveg ótrúlegt hvað hún er búin að tóra í dag. Hún er búin að vera vakandi síðan kl hálf fjögur í nótt. Hún hefur ekkert viljað leggja sig og er búin að vera svo dugleg að dunda sér í dag við að lita á milli þess sem hún horfir á sjónvarpið. Mamma hennar er aftur á móti þokkalega þreytt enda búin að vera svotil vakandi síðan kl hálf tvö í nótt, svaf reyndar eitthvað í sófanum í nótt/morgun á meðan skvísan var að dunda sér. Nú er bara að vona að Andrea sofi í alla nótt og komi sem minnst upp í rúm svo hægt sé að ná upp hvíld til að vera tilbúin í þriðja veikindadaginn.

Ég skrapp í sumarbústað með stelpunum um helgina. Vorum í Brekkuskógi og höfðum það svo kósý. Fórum mikið í pottinn og elduðum æðislega gott læri á laugardagskvöldið og fengum svo góðan eftirrétt þó að jarðarberin hefðu vantað Þetta var þvílíka afslöppunin og svo var veðrið æðislegt á sunnudeginum. Við urðum fyrir smá truflun á laugardagskvöldið þá komu einhverjir krakkar ( í kringum tvítugt) og buðu okkur í partý í bústaðinn þeirra.. við kíktum í einhverjar 10 mín.

Gísli og Andrea höfðu það bara kósý um helgina skilst mér. Voru með kósýkvöld ala Andrea á föstudeginum. Á laugardeginum fékk skvísan að vaka soldið og sagði Gísli mér að hún hefði verið að gefa baby born brjóst Á sunnudeginum fóru þau að skauta og sagði Andrea mér að hún kynni sko alveg að skauta þar sem hún sá það í barnatímanum, var samt ekki alveg viss hvernig ætti að beygja. Henni fannst ofboðslega gaman og er stefnt að því að fara aftur. Þá ætla ég að fá að fara með.

Adda amma, var í aðgerð á fimmtudaginn, gekk bara vel og fékk hún að fara heim á sunnudaginn, alveg í tæka tíð fyrir afmælið sitt, en sú “gamla” varð fimmtug á mánudaginn. Við fórum auðvitað til hennar í kaffi. Það er víst meira um afmæli í mánuðinum, en Þóra Sigga vinkona varð 29 ára 2 nóvember og Auður frænka á afmæli líka í nóvember.. 19 nóv. minnir mig…

Ég er komin á 25 viku í meðgöngunni og hef verið frekar slæm í bakinu undanfarið. Fór til læknis á föstudaginn þar sem ég viðraði þá hugmynd við lækninn um að minnka vinnuna. Læknirinn sagði að það væri það lang skynsamlegast sem ég gæti gert, því ef ég myndi ekki gera það þá yrði ég alveg að hætta að vinna mun fyrr en ég áætla. Þannig ég fékk vottorð og er komin niður í 60% vinnu núna. Það er ekki komin mikil reynsla á þetta, þar sem fyrsti dagurinn í 60% vinnu var á mánudaginn og ég var að stússast svo mikið eftir vinnuna á mánudaginn að ég fékk að kenna á því um kveldið en í gær, þá var ég voða hlýðin og fór beint heim og lagðist upp í rúm í 1 1/2 klst. og fann þvílíkan mun á mér um kvöldið. Þó ég hafi síðan farið með Andreu í kringluna, að kaupa ný gleraugu og í leit að jólakjólnum. Hún er s.s. búin að velja og fá jólakjólinn, valdi fallegan fjólubláan kjól í Hagkaup og núna vantar bara spariskó á skvísuna og þá er hún ready fyrir jólin.

jæja þá er komið í ljós hver verður forseti Bandaríkjanna. Það eru miklar væntingar gerðar í garð Obama, vonandi nær hann að mæta þeim Annars er ég ósköp sátt með niðurstöður kosninganna, hefði ekki viljað sjá McCain vinna.

Síðan var víst einhver “snillingur” sem borgaði með 10.000.- kr. seðli fyrir matinn sinn, seðillinn var með mynd af Davíði Oddsyni. hehe finnst þetta soldið fyndið… og að afgreiðslumaðurinn skildi hafa tekið peninginn sem gildan, er bara enn fyndnara. Hefur samt örugglega fengið smá skömm í hattinn frá verslunarstjóranum.

Það er síðan farið að líða að jólum .. 49 dagar held ég. Andrea ætlar að föndra jólakortin í ár. Hún er búin að velja pappír og við erum búnar að kaupa eitthvað skraut til að líma á þau síðan ætlar hún held ég að mála eitthvað líka. Hún er líka búin að finna þrjá hluti sem hana langar að fá í jólagjöf og eru það úr, ekki tölvuúr það var tekið sérstaklega fram, veggklukku í “nýja” herbergið sitt og nýjustu bókina með Fíusól.