loftid.net

Andrea dró móður sína í þvílíkan göngutúr á laugardaginn Hún vildi endilega fara í göngutúr á einhvern róló. Allt í lagi með það við lögðum af stað, ákváðum að stoppa í Efstuhlíðinni fyrst, heilsa upp á ömmu og Gísla sem var að þrífa bílinn. Andrea vísaði leiðina og rataði alveg heim til ömmu sinnar, var bara ekki alveg viss hvar hún átti að fara yfir götuna. Eftir að hafa fengið rúsínupakka í nesti og knúsað ömmu sína aðeins var ákveðið að halda förinni áfram. Hún vildi fara á rólóinn sem var hjá húsinu með bláa þakinu, þau fara víst þangað stundum í leikskólanum. Við byrjuðum á því að ganga langleiðina í leikskólann hennar, sem er innst í Setberginu, Hlíðarendi, og fórum síðan yfir götuna og yfir móann. Fundum brú til að komast yfir lækinn og svo lá leiðin áfram inn í Setbergið og upp á móti. Andrea vissi alveg hvernig átti að komast á rólóinn og skemmti sér konunglega í göngutúrnum. Fræðandi mig um hvaða tré væru geitungatré og hvað tré stingu. Jæja loksins komumst við á leiðarenda. Rólóinn var s.s. í hlíðinni ská fyrir neðan Klukkubergið!! Mér brá soldið þegar ég sá hversu langt við höfðum gengið en Andrea var hin kátasta og lék sér í kastalanum. Við röltuðum síðan til baka með viðkomu á öðrum róló. Gísli tók okkur svo upp í þegar við vorum svo til komnar aftur upp í Efstuhlíð.

Við útbjuggum einnig tvö skókassa til að setja í “jól í skókassa” verkefnið. Andrea valdi af kostgæfni hvað af fötunum sínum og dóti hún var tilbúin að gefa fátæku börnunum í Úkraníu. Nú þarf bara að fara með kassana til KFUM.

Heilsan mín var ekki upp á sitt besta um helgina.. þá aðallega svona seinni part dags og á kvöldin. Hef aldrei upplifað annan eins sársauka og á laugardagskvöldið þegar ég ætlaði að standa upp úr sófanum!! Brjósklosið þar á ferð að gera mér grikk. Lagaðist örlítið eftir að Gísli hjálpaði mér að teygja aðeins á bakinu og eftir að hafa gengið aðeins um íbúðina. Lá síðan það sem eftir var af kvöldinu á heitum bakstri.

jæja Andrea er að reyna á okkur foreldrana, gá hvað hún kemst langt.. minnir stundum á “gelgju”. Þessi hegðun er eiginlega bara svona allt í einu komin, spurning hvort þessi breyting hjá henni sé vegna þess að það er að koma lítil systir eða kannski er hún bara komin á fyrsta “gelgjuskeiðið”. Við reynum að taka á þessu við hana. Átti samt erfitt með mig í gærkvöldi.. svona eftir á, þegar ég fór aðeins að hugsa þetta. Þetta var nú bara frekar fyndið.

En hún fór til augnlæknisins í gær og er niðurstaðan núna sú að hún er enn með verri sjón á vinstra auganu heldur en því hægra. En það munar víst bara einni línu og því ekki þörf á að hún sé með leppinn. Það er víst notaður leppur þegar það munar tveim línum. Hún er með góða þrívíddarsjón sem er mjög gott þar sem maður þarf að hafa góða sjón á báðum augum til að sjá vel þrívíddarmyndir. Svo er mæting aftur í febrúar

Hún bíður spennt eftir litlu systur, er búin að láta okkur pabba sinn skrifa niður nöfn á lista. Þau eru nokkur góð og sum ekki svo góð. Hún samþykkti þó að við myndum ekki skíra litlu systur Pocahontas en vildi samt fá nafnið á listann. Hún vill líka ólm fara í búðir og kaupa bleyjur, diska, glös og pela handa systur sinni. Er búin að segja henni að það sé aðeins of snemmt í þannig innkaup og að hún fái nú pottþétt að koma með þegar ég fer að versla þessa hluti.

Síðasta laugardag fengum við að fylgjast með ballettímanum. það var mjög gaman henni hefur greinilega farið fram síða á síðustu önn. En það var greinilegt hvaða dans henni þótti leiðinlegastur, því þá fór hausinn út á hlið og tungan út. En hún stóð sig vel og tók sig vel út. Emilía líka, þær eru ótrúlega góðar saman þarna vinkonurnar. Verst að myndavélin var batteríslaus þannig ég gat ekki tekið neinar myndir en tek þá bara fleiri myndir þegar jólasýningin verður.

Annars er voða lítið af okkur að frétta.

Við vorum að koma úr 20 vikna sónar Fæðingarlæknirinn skoðaði allt voða vel og var ánægð. Hún sagði að allt liti vel út og þannig. En við sögðum henni að það hefði líka verið þannig útlitið í 20 vikna sónarnum hjá Andreu. Þá sagði hún að yfirleitt er bara mælt annar upphandleggurinn og annar lærleggurinn. Hún mælti núna báða upphandleggi og framhandleggi og báða lærleggi og kálfa. Hún sagði að þetta væri allt mjög svipað og að hún væri ánægð með allar hreyfingar hjá barninu. Það var líka í lagi með hjartað, heilann, neðri vörina, nýrun og hrygginn. Við eigum að koma aftur í sónar eftir 8 vikur. Eftir 28 viku er víst mjög erfitt að skoða þar sem þá eru þau orðin svo stór og hreyfa sig lítið. Læknirinn vildi meina að ekki væri hægt að sjá meira í þrívíðarsónar heldur en hún sá núna. Hún sagði einnig að þær sem væru að gera þrívíðarsónarinn væru ekki þjálfaðar í að finna galla. Þetta væri svona eins og að fara í portrétt myndatöku.

Við fengum síðan að vita kynið og er það önnur stelpa Gísli verður s.s. í kvennaveldi

Við segjum Andreu fréttirnar af þessu í dag og verður gaman að sjá viðbrögðin hjá henni.

jæja þá er snjórinn kominn.. en skilst að hann fari í dag eða á morgun. Andrea var alveg himinlifandi í gær þegar hún sá snjókomuna og enn ánægðari í morgun þegar hún sá að snjórinn var enn þá. Snjórinn hafði því góð áhrif í morgun, auðveldara að vekja litlu svefnpurkuna og auðvelt að koma henni í föt sem hæfa veðri. Hún vill alltaf vera í pilsi eða kjól alveg sama hvernig viðrar. En í morgun sagði hún: “mamma þú mátt velja fötin því ég veit ekki hvaða föt eru góð í snjó.” Mín voða ánægð með það enda gekk morgunin stórslysalaust og Andrea gat ekki beðið eftir að komast út og gera engla í snjónum.

Ég er enn og aftur komin á pensilín, fékk einhverja kvefpest með tilheyrandi beinverkjum og hausverk dauðans. Kíkti á læknavaktina í gær og kom í ljós að ég er með stíflaðar kinnholur og jafnvel einhverja sýkingu í þeim. Þannig pensílin var skaffað.. hlakkar til eftir 10 daga þegar sá kúr er búinn.

Við hittum arkitektinn aftur í gær og fórum yfir teikningarnar 3 sem við höfum fengið og sögðum henni hvað okkur fannst um þær og hún ætlar að leggjast yfir þetta og hefur svo samband með 4 tillöguna í næstu viku Allt mjög spennandi.. þrátt fyrir svartan efnahag í landinu. Maður verður bara hálf niðurdreginn á því að hlusta á fréttir.

Skvísan okkar hefur stundum ansi lítið hjarta. Hún vaknaði í nótt með tárin í augunum því hana dreymdi illa. Ég tók utan um hana og spurði hvort hún vildi segja mér frá draumnum, hún sagði að hana hefði dreymt að hún vildi fara í pils en hefði ekki mátt fara í pils. Þetta var fljótlagað með smá knúsi og klósettferð, eftir það var draumurinn gleymdur.